Өрттөн каза болгондордун сөөгүн алып келүүчү атайын борт Москвадан учуп чыкты

Каза болгондордун сөөгүн алып келүүчү атайын борт туугандарынын жана вице-премьер-министр Гүлмира Кудайбердиева башында турган өкмөттүк топтун коштоосунда Москва шаарынан Кыргыз өлкөсүнө бүгүн, 29-августта Бишкек убактысы боюнча саат 17:00дө Москва-Ош-Бишкек багыты менен учуп чыкты. Бул тууралуу Кыргыз Республикасынын Өкмөтүнүн Аппаратынын маалыматтык камсыздоо бөлүмү билдирди.

Ош жана Жалал-Абад облусунун тургундарынын сөөгү Өзгөчө кырдаалдар министрлигинин өкүлдөрү тарабынан Ош шаарына жеткирилип, акыркы сапарга узатуу үчүн жакындарына берилет, ал эми Чүй жана Ысык-Көл облусунун тургундарынын сөөгү Бишкек шаарынан туугандарына берилери маалым болду.

Эскерте кетсек, Кыргыз Республикасынын Вице-премьер-министри Гүлмира Кудайбердиева башында турган Москва шаарында каза болгондордун жакындарына жана туугандарына көмөк көрсөтүү боюнча өкмөттүк штаб кечээ, 28-августта Кыргыз Республикасынын Премьер-министри Сооронбай Жээнбековдун чечими менен түзүлгөн. Каза болгондордун сөөгүн өлкөгө алып келүү жана акыркы сапарга узатуу боюнча бардык чыгымдарына тийиштүү маселелер Кыргыз Республикасынын Өкмөтү тарабынан чечилет.