Кытай кыргыз тараптан өзүнүн жарандарынын коопсуздугун камсыз кылууну талап кылды

Кытайдын Кыргыз Республикасындагы элчилигинде болгон жардыруу боюнча жоопкерчиликти бир да топ моюнуна алган жок. Бул тууралуу бүгүн, 30-августта маалымат жыйынында Кытайдын Тышкы иштер министрлигинин расмий өкүлү Хуа Чуньин билдиргенин орусиялык "Риа" интернет-басылмасы жарыялады.

"Жардыруу бүгүн эртең менен орун алды. Биз кыргыз тарап менен байланышып, кыргыз жарандарынын жана кытай уюмдарынын коопсуздугун камсыз кылууну, окуяны тергөөнү талап кылдык. Биз кыргыз тарап менен иштешип, тергөөнүн жыйынтыгы менен бизди тааныштырып турууну сурандык. Биз Кытайдын чет өлкөлөрдөгү элчиликтеринин кызматкерлеринин коопсуздугу үчүн бардык чараларды көрүп жатабыз", - деди Хуа Чуньин.

Айта кетсек, бүгүн, 30-августта Бишкектеги Кытай элчилигинин батыш тарабындагы дарбазаны Мицубиси Делика унаасы катуу ылдамдыкта келип сүзүп, жарылган. Жарылуу катуу болгондуктан, унаанын тетиктери 300 метр аралыкка чейин чачыраган. Саламаттыкты сактоо министрлигинин маалыматына караганда, жарылган унаанын ичиндеги айдоочу каза таап, эки күзөт кызматкери жабыркаган.