Жогорку Кеӊештин депутаттары Москва шаарында өрт кырсыгынан курман болгон Кыргыз өлкөсүнүн жарандарынын үй-бүлөлөрү менен жолугушуп, материалдык жардам берет

Жогорку Кеңештин депутаттары 27-августта Москва шаарындагы өрт кырсыгынан курман болгон 14 кыз-келиндин үй-бүлөлөрү менен жолугушат. Жогорку Кеңештин маалымат кызматынан билдиришкендей, материалдык жардам берүү үчүн төраганын орун басары Нурбек Алимбеков менен депутат Төрөбай Зулпукаров Ош облусуна, төраганын орун басары Алтынай Өмүрбекова Чүй облусунун Кемин районуна, депутат Данияр Аттокуров Ысык-Көл облусуна жөнөп кетти. Жогорку Кеңештин төрагасынын резервдик фондунан 1 миллион сом бөлүнөрү чечилген.

Эскерте кетсек, 27-августта Москва шаарынын түндүк-чыгыш тарабындагы Алтуфьев шоссесинде жайгашкан басмаканадан чыккан өрттөн 17 адам каза таап, 3 адам жаракат алган. Каза болгондордун ичинен 14 адам Кыргыз өлкөсүнүн жараны. Калган үчөө Орусиянын жарандары. Каза болгон 14 кыз-келиндин жансыз денелери учак менен Кыргыз жерине алынып келинип, 30-августта өз айылдарында жерге берилди.