Борбордук “Ала-Тоо” аянтында Эгемендүүлүк күнүнө арналган майрамдык иш-чара аяктады

11:10 Кыргыз Республикасынын эгемендүүлүгүнүн 25 жылдыгына арналган майрамдык иш-чара аяктады.

11:05 Майрамдык аскердик жүрүштү тик учактар улантууда. Тик учактар Кыргыз Республикасынын Мамлекеттик туусун аянт үстүнөн желбирете алып учушту.

11:00 Борбордук аянтка ачык асманды коргогон Кыргыз Армиясынын күжүрмөн аскер техникасы кирип жатат. Аскер техникасынын жүрүшүн УАЗ автоунаалары баштап келе жатышат. Алардын артынан абадан коргоо техникалары, атайын багыттагы аскердик техника дагы аянтка чыкты. Бул топтун ичинде мотоаткычтардын Т-72 танкалары аянттан өтүүдө.

10:50 Кыргыз Республикасынын Куралдуу күчтөрүнүн Башкы штабынын аскердик топтору, Ички иштер министрлигинин өздүк курамы жана Өзгөчө кырдаалдар министрлигинин куткаруучулары майрамдык жүрүштөн өтүп жатышат.

10:45 Президент кыргыз элин эгемендүүлүктүн 25 жылдыгы менен куттуктады, Кыргыз Республикасынын гимни жаңырып, аскердик жүрүш башталды.

10:10 Куралдуу күчтөрдүн Башкы штабынын жетекчисинен рапортту кабыл алып, Кыргыз Республикасынын Президенти Алмазбек Атамбаев куттуктоо сөзүн сүйлөп жатат.

09:45 Борбордук “Ала-Тоо” аянтында Кыргыз Республикасынын эгемендүүлүгүнүн 25 жылдыгына арналган салтанаттуу иш-чара башталды. Кыргыз Республикасынын Президенти Алмазбек Атамбаев майрамдык иш-чарага келип, Кыргыз Республикасынын Куралдуу күчтөрүнүн Башкы штабынын жетекчиси Райимберди Дүйшөнбиев тизилген аскердик топторду кыдырды. Өз кезегинде Райимберди Дүйшөнбиев президентке рапорт берди.

Бүгүн, 31-август күнү Кыргыз Республикасы эгемендүүлүгүнүн 25 жылдыгын белгилөөдө.