Жалал-Абад ОИИБи: "Токтогул сейил багында уруш чыгаргандар учурда шаардык Ички иштер бөлүмүндө"

Бүгүн, 31-августта "Жалал-Абаддагы Токтогул сейил багында милиция кызматкерлери тургунду сабап жатышат" деген маалыматты окурман SUPER.KG порталына жиберген.

Бул окуя тууралуу Жалал-Абад ОИИБинин басма сөз катчысы, ага тескөөчү Мыктыбек Турдубековго байланышка чыкканыбызда, милиция кызматкерлери тургунду сабашпаганын айтты.

"Бүгүн майрамда коомдук жайларда милиция кызматкерлери күчөтүлгөн тартипте иштеп жатышат. Алдын ала айтылган маалыматтар боюнча, эки жарандын ортосунда түшүнбөстүк жаралып, уруш чыккан. Ошол аймактагы милиция кызматкерлери урушуп жаткандарды ажыратышкан. Бирок алар коомдук тартипти бузгандыгы үчүн жооп берүүдөн баш тартып, каршылык көрсөтүшкөн. Милиция кызматкерлери кошумча күч чакырууга мажбур болушкан. Уруш чыгаргандар Сузак районунун Кара-Дарыя айылынын жана Жалал-Абад шаарынын тургундары экени аныкталды. Алар учурда Жалал-Абад ШИИБинде. Жарандардын үстүнөн жана окуя боюнча тергөө, иликтөө иштери жүрүп жатат", - деди Турдубеков.