Москвадагы өрт: Кыздарынан айрылган ар бир мекендешибизге 1 миллион рубль өлчөмүндө компенсация төлөнүшү мүмкүн

27-августта Москва шаарынын түндүк-чыгыш тарабындагы Алтуфьев шоссесинде жайгашкан басмаканадан чыккан өрттөн каза болгондордун жакындарына 1 миллион рубль өлчөмүндө компенсация төлөнүшү мүмкүн. Бул тууралуу Орусиянын басылмалары Федералдык кызматтын башчысынын орун басары Михаил Иванковго шилтеме берүү менен билдиришти.

Өрттө 17 адам каза таап, 4 адам жаракат алган. Алардын 14ү Кыргыз өлкөсүнүн жараны экени аныкталган (аты-жөндөрү). Калган үчөө Орусиянын жарандары. Анда каза тапкандардын басымдуу бөлүгү 18 жаштан 25 жашка чейинки курактагы кыздар болгон. Алардын сөөктөрү 29-август күнү Кыргыз жерине алынып келинди.

Бул төлөмдү Орусиянын гана жарандары эмес, Кыргыз Республикасынын жарандары да алышы мүмкүн, эгерде алардын Орусиянын аймагында жумушка орношууда атайын уруксат алганы аныкталса. "Биздин алдыбыздагы тапшырма - тиешелүү документтерди карап чыгуу. 2 аптанын ичинде жыйынтык чыгарабыз", - дейт Иванков.