Бүгүн Өзбекстандын эгемендүүлүгүнүн 25 жылдыгына арналган майрамдык салют атылбайт

Салт болуп калгандай, 1-сентябрда Алишер Навои атындагы Улуттук сейил бакта Ташкентте көз карандысыздыктын урматына салют атылчу. Быйыл Өзбекстандын эгемендүүлүгүнүн 25 жылдыгына арналган майрамдык салют башка күнү атыларын Ташкент шаардык акимчилигинин маалымат кызматы маалымдады.

Маалыматка ылайык, футбол мелдешинен жана элдин сейилдөөсүнөн кийин жолдордо автоунаа тыгындарын болтурбоо максатында майрамдык фейерверк башка күнгө жылдырылды. Мындан тышкары ушундай чечим кабыл алууну коомчулуктун кеңири катмары, өзгөчө улуу муун өкүлдөрү жана аксакалдар суранышкан.

Маалымат үчүн: Ташкенттеги "Бунёдкор" стадионунда бүгүн, 1-сентябрда саат 20:00дө Өзбекстан менен Сириянын курама командалары Дүйнө чемпиондугу үчүн үчүнчү квалификациялык раундда беттешет. Оюнга 35 миңден ашуун күйөрман келери күтүлүүдө.

Майрамдык салют качан болору такталган жок.