Аскер прокуратурасы аскердик кызмат өтөөдөн качкандардын мунапыс алуу мүмкүнчүлүгү бар экенин жарыялады

Баткенде аскердик кызмат өтөөдөн качкан 5 жаран үчүн мунапыс жарыяланды. Бул тууралуу Баткен гарнизонунун аскер прокурору Жанар Мырзаканов билдирди.

"Аскер бөлүгүн же кызмат ордун өзү билип таштап кеткен аскер кызматчыларына, учурда издөөдө жүргөндөргө кылмыш-жаза жоопкерчилигинен кутулууга жана мунапыс актысын колдонууга мүмкүнчүлүк бар. 2016-жылдын 9-августунда "Кыргыз Республикасынын эгемендүүлүгүнүн 25 жылдыгына жана 1916-жылдагы улуттук боштондук көтөрүлүшүнүн 100 жылдыгына байланыштуу мунапыс жарыялоо жөнүндө" КРнын мыйзамы ишке кирди. Мыйзамга ылайык, КРнын Кылмыш-жаза кодексинин 359-беренеси (аскер бөлүгүн же кызмат ордун өзү билип таштап кетүү), 360-берененин 1-бөлүгү (аскерден качуу) боюнча кылмыш жасагандар 3 айдын ичинде, ушул жылдын 9-августунан 9-ноябрына чейин кызмат ордуна же КРнын Аскер прокуратурасына келишсе, кылмыш-жаза жоопкерчилигинен бошотулат. Учурда аскердик кызмат өтөөдөн качкан 5 жаран үчүн мунапыс жарыяланды. Алар: Радмир Абаев, Станислав Борисов, Ильязбек Халилов, Абдурахим уулу Рахманалы, Дильшод Абаров", - дейт Ж.Мырзаканов.

Анын айтымында, аскер кызматчылары ыктыярдуу түрдө аскер кызматын өтөгөн жерине жана Баткен гарнизонунун аскер прокуратурасына келип, мунапыс актысын колдонуп, андан ары кылмыш-жаза жоопкерчилигинен бошоно алышат.

Ал эми Бишкек гарнизонунун аскер прокурору, юстиция майору Эдилбек Стакеев билдиргендей, Баткен облусунан тышкары Ош, Жалал-Абад жана Балыкчы аскер прокуратураларына да кайрылса болот.

• Баткен гарнизонунун аскер прокуратурасы – Баткен облусу, Кадамжай шаары, Киров көчөсү, 30;
• Ош гарнизонунун аскер прокуратурасы – Ош шаары, Петров көчөсү, 33;
• Жалал-Абад гарнизонунун аскер прокуратурасы – Жалал-Абад шаары, Ж.Бакиев көчөсү, 26;
• Балыкчы гарнизонунун аскер прокуратурасы – Балыкчы шаары, Кыргызстанга 40 жыл көчөсү, 168.