II Дүйнөлүк көчмөндөр оюндары: 13 алтын медаль тагынган кыргыз спортчулары Орусияны артка таштап, сап башына чыгышты

II Дүйнөлүк көчмөндөр оюндарынын алкагында 6-сентябрда кыргыз күрөшүнөн медалдар ойнотулду. Анда кыргыз спортчулары атаандаштарга кенедей да мүмкүнчүлүк калтырбай, бардык салмактарда алтын медалдарды тагынышты.

Жыйынтыгында кыргыз спортчулары буга чейин сап башында келе жаткан Орусияны артка таштап, 1-орунду ээлеп турат.

Кыргыз күрөшү боюнча 7 комплект медаль ойнотулуп, ага 26 мамлекеттин 96 балбаны катышкан. Балбандарыбыз Тынчтыкбек уулу Бекзат (55 килограмм салмакта), Сымбатбек Алимбеков (60 кг), Зиямидин Шадыбеков (66 кг), Тариэл Үсөнов (74 кг), Бектурган Кожомуратов (84 кг), Нурбек Кожобеков (96 кг) жана Бекболсун Кушубаков (96 килограммдан жогорку салмак) алтын медалдарды тагынышты.

Командалар жана медалдар боюнча ээлеген орундары:

1. Кыргыз Республикасы — 40 медаль (13 алтын, 12 күмүш, 15 коло)

2. Орусия — 21 медаль (10 алтын, 5 күмүш, 6 коло)

3. Казакстан — 18 медаль (5 алтын, 6 күмүш, 7 коло)

4. Азербайжан — 9 медаль (3 алтын, 3 күмүш, 3 коло)

5. Грузия — 3 медаль (2 алтын, 1 күмүш)

6. Иран — 6 медаль (2 алтын, 4 коло)

7. Тажикстан — 4 медаль (1 алтын, 1 күмүш, 2 коло)

8. Өзбекстан — 6 медаль (2 күмүш, 4 коло)

9. Армения — 3 медаль (2 күмүш, 1 коло)

10. АКШ — 3 медаль (2 күмүш, 1 коло).