Жеңиш жаңы конушунун тургундары социалдык объектилерге болгон муктаждыктарын айтышууда

Бишкек шаарынын Жеңиш жаңы конушунда жол асфальтталган эмес, бала бакча өңдүү эл муктаж болгон социалдык объектилер жок. Бул тууралуу жергиликтүү жашоочулар билдиришти.

"Өткөн жылы ашар жолу менен канализация куруу үчүн өзүбүз 28 миң сомдон акча чогултканбыз. Бирок бардык үй-бүлөдө тең шарт болбогондуктан, акча чогулбай, иш токтоп турат", - деп билдирди жергиликтүү тургун Марс Токталиев.

Бермет Мамбетакунова: "Буга чейин депутаттар шайлоо алдында сөз берип кетишкен. Добушубуз керек болгондо ар шайлоодо келип убада беришет. Жолубуз асфальтталбай айылды чаң каптап жатат. Ал эми айылда бала бакча жок. Балдарыбыз мектепке даяр болбой, билим деңгээли төмөн болуп жатат".

Белгилүү болгондой, Жеңиш жаңы конушунда 500дөн ашуун түтүн эл жашайт. Аталган айылга буга чейин таза суу, электр энергиясы тартылган. Негизги эки шарт түзүлгөнү менен, башка жагдайларга эч кандай көңүл бурулбаганын айтышат жергиликтүү тургундар.