Бишкекте сууда агып бараткан 2 жашар баланы куткарган 5-класстын окуучулары сыйланышты

Бишкек шаарынын Көлмө конушунда Ала-Арча дарыясында агып бараткан 2 жашар баланы 5-класстын окуучулары куткарышты. Бүгүн, 13-сентябрда шаардык мэрияда аларга сыйлык тапшыруу аземи өттү.

Маалыматка караганда, окуя 4-сентябрда болгон. Бул күнү №78-орто мектебинин 5-классынын окуучусу Баяман Азимов достору Арсен Камбаралиев жана Эрнис Ташболотов менен дарыянын жанында ойноп жатып сууда агып бараткан баланы байкап калган. Алар баланы суудан чыгарышканда, Баяман жасалма дем алдыруу аркылуу наристенин өмүрүн сактап калган.

Бишкек шаардык кеңешинин төрагасы Алмаз Кененбаев жаш куткаруучуларды шаардык кеңештин атынан сыйлады. Эрдик көрсөткөнү үчүн Баяман Азимов Бишкек шаардык кеңешинин Ардак грамотасы жана "Патриот" төш белгиси менен сыйланды. Анын достору Арсен Камбаралиев менен Эрнис Ташболотовго Ардак грамоталары тапшырылды. Мындан тышкары №78-орто мектебинин эмгек жамаатына ыраазычылык айтылды.