16 спорт түрү боюнча 9 мамлекеттин спортчуларынын катышуусунда "Эл аралык Ысык-Көл оюндары" мелдеши старт алды

13-сентябрда Ысык-Көл облусундагы Чолпон-Ата шаарында 16 спорт түрүнөн XVI Эл аралык Ысык-Көл оюндары старт алды. Бул тууралуу Жаштар иштери, дене тарбия жана спорт мамлекеттик агенттигинен кабарлашты.

Маалыматка ылайык, мелдештин ачылыш аземине агенттиктин директорунун орун басары Руслан Жуманазаров, Ысык-Көл районунун акими Данияр Иманалиев жана башкалар катышты. Мелдешке Венгрия, Германия, Казакстан, Латвия, Орусия, Түркмөнстан, Бангладеш, Мальдив аралдары жана Кыргыз Республикасынын спортчулары катышууда.

Мелдештин программасында армрестлинг, стритбол, волейбол, гиря көтөрүү, дартс, жеңил атлетика, кичи футбол, аймактык футбол, стол тенниси, кум үстүндөгү күрөш, кум үстүндөгү самбо, бука тартыш, сууда сүзүү, кум үстүндөгү волейбол, аркан тартыш жана массалык чуркоо сыяктуу спорт түрлөрү бар.