"Жаңы толкун" сынагында мен ырдаган "Чувства мои" чыгармасы боюнча Игорь Крутойдон сунуш түштү" дейт Нурсултан Азыкбаев

Бүгүн, 15-сентябрда Орусиянын Сочи шаарында өткөн "Жаңы толкун" музыкалык сынагына катышып, төртүнчү орунду ээлеген Нурсултан Азыкбаев сынак тууралуу, андан алган тажрыйбалары жана келечектеги пландары тууралуу маалымат жыйын өткөрдү.

"Мени колдогон кыргыз элиме, бардык күйөрмандарыма ыраазычылык билдирем. Алыста жүрсөк да элдин колдоосун сезип жаттык. Тилекке каршы, жеңишке жете алган жокмун, бирок мыкты тажрыйба топтоп, дос-тааныштарды таптым. Сынак жогорку деңгээлде өттү. Катышуучулар менен достук мамиле түздүк, келечекте мыкты долбоорлордун үстүндө иштөөнү пландап жатабыз.

Сынакта Григорий Лепс менен ырдамак болчумун, бирок анын тыгыз иш графигине байланыштуу ырдабай калдым. Сынак учурунда орусиялык белгилүү продюсер, композиторлор келип, жылуу сөздөрүн айтып жатышты. Сынакка 12 өлкөдөн күчтүү ырчылар келишкен эле, андыктан калыстар үчүн тандоо чечимин кабыл алуу да кыйын болуп жатты, - дейт Нурсултан Азыкбаев.

Келечектеги пландары, сынак учурунда түшкөн сунуштар тууралуу буларга токтолду:

"Дебюттук альбомумду чыгарууну, эл аралык сынактарга катышууну пландап жатам. Ырчы Арсендин сынакта мен ырдаган "Чувства мои" ("Сезимим менин") чыгармасы боюнча Игорь Крутойдон "бизге бербейсиңерби, орусиялык радиостанциялардан жаңырсын" деген сунуш түштү. Азыр ушул боюнча сүйлөшүүлөр жүрүп жатат".