Бишкектеги кафелердин биринен мас абалда кыздарды ур-токмокко алган жаран изделүүдө

Бишкектеги кафелердин биринен мас абалда кыздарды ур-токмокко алган жаран изделүүдө. Бул тууралуу бүгүн, 16-сентябрда SUPER.KG порталына Бишкек шаардык ички иштер башкы башкармалыгынын басма сөз катчысы Олжобай Казабаев билдирди.

Маалыматка ылайык, окуя 22-августта борбордогу кафелердин биринде орун алган. Анда мас абалдагы болжол менен 55-60 жаштагы Мирлан аттуу киши кафенин кардарларына тийишип, терс жооп алганда аларды ур-токмокко алган.

Социалдык тармактарга жабырлануучулардын бири төмөнкүлөрдү жазып, аларды сабаган кишини табууга көмөктөшүүнү суранган: "Биз курбумдун туулган күнүн белгилеп жатканбыз. Видеодогу киши алгач кафедеги кыздарга тийише баштады. Кийин бийлеп жаткан кыздарга да тийишүүгө өткөн. Биз даараткана жакта турганыбызда ал өтүп баратып менин денемди кармалап өттү. Мен, албетте, өз абийиримди коргоого аракеттендим, бирок жаман сөздөрдөн башка эч нерсе уккан жокмун. Ал "эртең сени таап, өлтүрөм" деп айтты. Ошондон кийин ортобузда мушташ чыкты. Күзөт кызматы аны сыртка чыгарып, үйүнө кетирип жиберген. Натыйжада менин баш мээм чайкалып, курбумдун мурду, кулагы жабыркаган. Арадан бир ай өттү, бирок эч кандай жылыш жок. Мындай жоруктар жөн калбашы керек, ал өз жазасын алууга тийиш!"

Бишкек ШИИББинин басма сөз катчысы Олжобай Казабаев бул окуя боюнча иликтөө иштери жүрүп жатканын билдирди. "Жабырлануучулардын бири милицияга арыз менен кайрылган. Экинчи жабырлануучу соттук-медициналык экспертизадан өткөнү боюнча тиешелүү документтерди алып келип тапшырды. Учурда видеодогу жаранды издөө иштери жүрүүдө. Илинчектер бар, аз убакыттын ичинде ал кармалат", - дейт ал.