"Дордой" футболдук клубу "Алайды" утуп, тарыхында 8-ирет өлкө кубогуна ээ болду (фото)

Бүгүн, 18-сентябрда футбол боюнча өлкө кубогунун финалы орун алды. Д.Өмүрзаков атындагы стадиондо бишкектик "Дордой" менен Оштун "Алай" клубу беттешти. Жыйынтыгында "Дордой" клубу 1:0 эсебинде утуп, өз тарыхында 8-ирет кубокко ээ болду.

Беттеш "Алайдын" футболчуларынын катар-катары менен уюштурулган чабуулу менен башталды. Бир топто барып "дордойчулар" топко көзөмөл кылууну ишке ашырышты. 1-таймда командалар топту дарбазага жөнөтүүнүн жолун таба алышкан жок. 2-таймды "Дордойдун" футболчулары активдүү башташты. 60-мүнөттө Дэвид Тэтте топту дарбазага таамай багыттап, жеңиш голун киргизди. "Алайлыктардын" андан ары көргөн аракеттери натыйжа берген жок.

1992-жылдан тарта өткөрүлүп келген мелдешти "Дордой" ушуну менен өз тарыхында 8 ирет жеңип алды (2004, 2005, 2006, 2008, 2010, 2012, 2014, 2016). Ал эми "Алай" бир канча ирет финалга чыкканы менен, жеңишке бир гана жолу жетишкен (2013-жыл).