Камакка алынган депутаттарга маяна төлөөнү токтотуу демилгеси экинчи окууда жактырылды

Жогорку Кеңештин Конституциялык мыйзамдар, мамлекеттик түзүлүш, сот-укук маселелери жана парламенттин регламенти боюнча комитетинде камакка алынган депутаттардын эмгек акысын төлөп берүүнү токтотууга багытталган мыйзам долбоору экинчи окууда каралды. Мыйзам долбоорунун демилгечилери – депутаттар Аида Салянова, Наталья Никитенко, Айсулуу Мамашева. Жыйын учурунда депутат Чолпон Султанбекова демилгечи депутаттар жыйында жок болгондуктан, демилгени артка кайтарууну сунуштады. "Мыйзам долбоорун сунуштап жаткандан кийин бул жерге келип, жооп берүү керек да. Өздөрү кызыкдар болбосо, эмне үчүн биз карап беришибиз керек? Экинчи окууда каралып жаткандыктан, суроолор пайда болушу мүмкүн. Ошондуктан артка кайтарууну сунуштайм", - деди Султанбекова.

Депутат Исхак Масалиев мыйзам долбоору экинчи окууга келгенде комитет төрагасы баяндама жасап, суроолорго жооп берүүсү керектигин айтты. "Ошондуктан сөзсүз эле демилгечилердин болушунун зарылчылыгы жок. Карап чыксак болот", - деди ал.

Мыйзам долбоору боюнча сунуштар болбогондуктан, комитет экинчи окууда жактырды.

Эске салсак, буга чейин камакка алынган депутаттар маянасын алууну уланткан учурлар болгон. Эгер камакка алынган депутат акталып чыкса, анда эмгек акысы толугу менен төлөнүп берилет.