Аксы районунда Үңкүр-Тоо боюнча 27-сентябрда кайрадан митинг өткөрүлөт

Аксы районунда мекенчил жигиттер жана жергиликтүү кеңештин депутаттары 27-сентябрда райондук мамлекеттик администрациянын алдына митингге чыгышат. Бул тууралуу бүгүн, 20-сентябрда митингди уюштуруучулардын бири Сапар Наркеев билдирди.

"Тоонун айланасында жашаган Мамай, Устукан айылдарынын тургундарынын коопсуздугуна канчалык деңгээлде кепилдик берилет? Ошондой эле Өзбекстандын күч кызматкерлери кандай келишим менен чыгып кетишти, тактап айтканда, Үңкүр-Тоо кайсы элдин пайдасына чечилди?" деген маселени тактоо максатында митинг өтөт", - деди Наркеев.

Маалыматка ылайык, Аксынын 12 айыл өкмөтүнөн мекенчил жигиттер, жергиликтүү кеңештин депутаттары чогулуп чечим кабыл алышкан. Алар алгач Үңкүр-Тоо маселеси канчалык деңгээлде өлкөнүн пайдасына чечилгенин тактоого аракет жасашууда.

Уюштуруучулардын бири Жанарбек Надырбековдун айтымында, митингге президент Алмазбек Атамбаев, Өмүрбек Текебаев, коомдук ишмер Азимбек Бекназаровду чакырышууда.