Австралияда уй тик учакты кырсыкка учуратты

Австралиянын Квинсленд штатында тик учак уйдун мүйүзүнө урунуп, күйүп кетти. Бул тууралуу бүгүн, 21-сентябрда чет элдик маалымат булактары жазып чыгышты.

Маалыматка ылайык, эки адамга ылайыкташкан Robinson R22 үлгүсүндөгү тик учак талаада жайылып жүргөн уйлардын үстүнөн учуп баратып бир уйдун мүйүзүнө тийип, башкаруусун жоготкон. Натыйжада кулап түшкөн учак толугу менен күйүп кеткен. Ал эми учкуч өз убагында тик учактан чыгып кетүүгө үлгүрүп, аман калган. Уй дагы эч кандай зыян тарткан эмес. Аталган Robinson R22 үлгүсүндөгү тик учактарды австралиялык фермерлер бодо жана майда малды кайтарууга, аларга бийиктен көз жүгүртүп туруу максатында колдонушат.

Эске салсак, мындай окуя үстүбүздөгү жылдын сентябрь айында Канадада катталган. Мында тик учак электр мамысын сүзүп кулаган.