Ички иштер министрлиги: Кадыржан Батыров эл аралык издөөгө алынган эмес

Жогорку Кеңештин Эл аралык иштер, коргоо жана коопсуздук боюнча комитети Кадыржан Батыровдун Европа коопсуздук кызматташтык уюмунун 20-сентябрдагы жыйынында сүйлөгөн сөзүнө саясий баа берүү маселесин талкуулады. Бул боюнча депутаттардын суроолоруна жооп берип жатып ички иштер министринин орун басары Данияр Абдыкаров Кадыржан Батыров эл аралык издөөдө эмес экенин айтты. Анын билдиришинче, Батыровду издөө боюнча Интерполго өтүнүч жиберилип, бирок Интерпол издөө саясий мүнөздө деп, өтүнүчтөн баш тарткан.

Батыров "саясий куугунтукка алынган" деген негизде 5 жылдан бери Швецияда жашап жатканы айтылды. Прокуратуранын өкүлү Швецияга Батыровду өткөрүп берүү боюнча кат жиберилип, бирок өлкө аны өткөрүп берүүдөн баш тартканын айтты. Батыров ЕККУнун жыйынында Конституцияны өзгөртүүгө каршы экенин айтып, улут аралык маселе боюнча сөз сүйлөгөн.

Эскерте кетсек, Кадыржан Батыровго "2010-жылдагы Ош окуясын уюштурууга катыштыгы бар" деген айып тагылып, сыртынан соттолуп, өмүр бою эркинен ажыратылган.