Араван районунда 18 жаштагы жигиттин өлүмүнө сүйлөшкөн кызынын айылдаштары шектелишүүдө

Ош облусунун Араван районунда 18 жаштагы жигиттин өлүмүнө сүйлөшкөн кызынын айылдаштары шектелип жатышат. Бул тууралуу Ош ОИИБинин басма сөз кызматы билдирди.

Маалыматка ылайык, 20-сентябрда Араван районунун Чек-Абад айылында болжол менен 20-25 жаштагы адамдын жансыз денеси табылган. Денесин текшерүүдө ур-токмокко алынгандыгынын белгилери байкалган. Каза болгон 18 жаштагы Маруфжон Наврузов Араван районунун Кара-Жантак айылынын тургуну экени аныкталды.

Аталган факт боюнча "адам өлтүрүү" беренесинин негизинде кылмыш иши козголуп, тергөө амалдарынын жүрүшүндө бул кылмышка шектүү катары 18 жаштан 24 жашка чейинки 5 адам кармалды. Алар убактылуу кармоочу жайга отургузулушту. Кылмышка шектүүлөр каза болгон баланын сүйлөшкөн кызынын айылдаштары экени белгилүү болду.