Өзгөндө баласы никесиз төрөлгөнүн жашыруу үчүн аны көчөгө таштап кеткен эне табылды

Өзгөн районунда 3 күндүк ымыркайын көчөгө таштап кеткен эне табылды. Бул тууралуу бүгүн, 26-сентябрда SUPER.KG порталына Ош облустук ички иштер башкармалыгынын басма сөз катчысы Жеңиш Ашырбаев билдирди.

"Окуя болгондон кийин эле баланы асырап алууну каалагандар чыккан. Арадан 3 күн өтүп, ымыркайдын энеси туугандары менен кайрылып, баланы кайтарып алууну көздөп жаткандыгын билдиришкен. 1994-жылы туулган баланын энеси өз сөзүндө турмушка чыкпаганын жана ымыркай никесиз төрөлгөнүн билдирген. Тууган-уругунан муну жашыруу үчүн ушул кадамга барганын кошумчалаган. Учурда бул окуя боюнча атайын комиссия түзүлүп, бул маселе каралууда. Комиссия бардык жагдайларды карап чыгып, анан бүтүм чыгармакчы", - дейт Ашырбаев.

Эске салсак, 3-сентябрь күнү саат 20:30 чамасында Өзгөн районунда көчөдөн 3 күндүк ымыркай табылган. Ымыркай Мырзаке айылындагы аймактык оорукананын төрөт бөлүмүнө өткөрүлүп берилген.