Тарых музейиндеги өрттүн келип чыгуу себеби аныкталды

Тарых музейиндеги өрттүн келип чыгуусуна электр жабдууларын колдонууда коопсуздук эрежелеринин бузулушу себеп болгон. Бул тууралуу бүгүн, 28-сентябрда Өзгөчө кырдаалдар министрлигинен билдиришти.

Маалыматка караганда, өрт тууралуу маалымат 22-июнь күнү саат 22:22 чамасында келип түшкөн. Аны өчүрүүгө 5 өрт өчүрүүчү унаа жана 100дөн ашык кызматкер тартылган. Тилсиз жоо 23-июнга караган түнү саат 04:42де толук өчүрүлгөн.

Бул боюнча ӨКМнын басма сөз кызматы: “Өрттүн кесепетинен жыйын өтүүчү залдын жанында жайгашкан кампанын ичиндеги 300 чарчы метр жараксыз кагаздар, ар кандай чарбалык иштерде колдонуучу буюм-тайымдар жарым-жартылай күйүп, түтөгөн. Бактыга жараша, көргөзмөгө коюлуучу экспонаттар зыянга учураган эмес. Алар толугу менен жер төлөгө киргизилген”, - деп билдирген.

3 ай аралыгында тиешелүү экспертизалар жүргүзүлүп, анын жыйынтыгында өрттүн келип чыгуусуна электр жабдууларын колдонууда коопсуздук эрежелеринин бузулушу себеп болгону аныкталган.