"Жылдын мыкты мугалими-2016" республикалык сынагынын жеңүүчүлөрү аныкталды

"Жылдын мыкты мугалими-2016" республикалык сынагынын жеңүүчүлөрү аныкталды. Бул тууралуу бүгүн, 30-сентябрда Билим берүү министрлигинин басма сөз кызматынан билдиришти.

Маалыматка ылайык, бул сынак 4 номинация менен Бишкек шаарында өткөрүлгөн: "Жылдын мыкты мугалими", "Жылдын мыкты инновациялык мектеби", "Жылдын мыкты бала бакчасы", "Жылдын мыкты айылдык мектеби". Буга чейин сынактын райондук жана облустук этаптары өткөрүлүп, жеңүүчүлөр республикалык сынакка катышууга жолдомо алышкан.

"Жылдын мыкты мугалими-2016" номинациясынын жеңүүчүсү болуп Баткен облусунун Лейлек районунун Набиев атындагы орто мектебинин кыргыз тили жана адабияты боюнча мугалими Бегайым Бегалиева табылды. "Жылдын мыкты инновациялык мектеби" номинациясы боюнча 1-орунду Бишкек шаарынын №68-мектеп-гимназиясы жеңип алган", - деп билдирди басма сөз кызматынан.

Белгилүү болгондой, "Жылдын мыкты бала бакчасы" номинациясы боюнча Чүй облусундагы Сокулук районунун №3-бала бакчасы 1-орунга ээ болгон. Мындан сырткары "Жылдын мыкты айылдык мектеби" номинациясы боюнча 1-орунду Ош облусуна караштуу Кара-Суу районунун Дадан Султанов атындагы орто мектеби камсыздаган.

Эскерте кетсек, аталган сынак 2009-жылдан бери өткөрүлүп келет.