Атактуулардын портретин жип жана мык менен тактайга түшүргөн Азамат Жаналиев кезектеги эмгегин жасады (фото)

Өнөрлүү жигит Азамат Жаналиев июль айында мык жана жип колдонуу менен Чеченстандын алгачкы президенти Ахмад Кадыровдун портретин тактай бетине түшүргөн (искусство String art деп аталат). Аны учурдагы президент Рамзан Кадыровдун колуна тапшырып келүү үчүн сүрөтчү Орусияга бет алган. Ал велосипед менен жолго чыгып, Казакстан, Орусия, Азербайжан жана Грузия аркылуу Чечен Республикасына жеткен. Президент менен жолугуу мүмкүн болбогондуктан, Азамат эмгегин президенттин администрациясына тапшырып, Санкт-Петербург шаарына жөнөгөн. Учурда сүрөтчү ушул шаардын тургундарын таң калтырууда.

Азамат Жаналиев жакында эле Пётр I`нин мык жана жип менен тактайга түшүрүлгөн портретин Санкт-Петербургдун тургундарына көрсөттү. Ал бул сүрөттү сата турганын билдирди.

Келечектеги пландары тууралуу ой бөлүшкөн Азаматтын кийинки сапары Түркияны көздөй болмокчу. Ал жактан Түркия Республикасынын негиздөөчүсү Мустафа Кемал Ататүрктүн элесин тактай бетине түшүрөт.

Кошумчалай кетсек, сүрөтчү алгачкы эмгеги болгон Чыңгыз Айтматовдун портретин 88 миң сомго саткан.