60 бажы кызматкерине 648 миң сомго кол сааттар сатылып алынганы жатат

Өкмөткө караштуу "Мамлекеттик бажы кызматынын камсыздоо борбору" мекемеси 648 миң сомго кымбат баалуу кол сааттарды сатып алат. Маалыматты SUPER.KG порталына бүгүн, 3-октябрда аталган мекемеден тастыкташты. Мамлекеттик сатып алуулар порталына илинген жарыяга таянсак, 11-октябрда сынакка катышууну каалаган тараптардын документтерин кабыл алуу башталат.

Сатылып алынган сааттар декабрь айынын аягында Мамлекеттик бажы кызматынын түзүлгөндүгүнүн 25 жылдыгына карата бажы кызматкерлерине белек катары берилет. Мырзаларга 40, айымдарга 20 даана кол саат сатылып алынат. Сааттар кварцтык механизмде, боосу кайыш, корпусу алтын жалатылган жана Swarovski ташы тагылган болушу шарт. Ошондой эле сөзсүз Швейцариядан чыгарылган болушу керек.

Өлкөнүн карызы 4 миллиард долларды чамалап, экономикасы аксап турган маалда өкмөттүк органдар ири суммаларды белектерге короткону жатат. Эл төккөн салыктын эсебинен бажы кызматкерлерине 10 800 сомдук сааттар тартууланмакчы.