Азимжан Аскаровду камактан бошотуу өтүнүчү канааттандырылган жок

Бүгүн, 4-октябрда Бишкектеги Жаза аткаруу кызматынын Күзөт жана кайтаруу департаментинде Чүй облустук соту Июнь окуясына күнөөлөнүп өмүр бою эркинен ажыратылган Азимжан Аскаровдун ишин кароодо. Анда айыпталуучунун жактоочусу Валерьян Вахитов Аскаровдун күнөөсүз экенин айтып, абактан бошотуу өтүнүчүн келтирген. Бирок соттук коллегия жактоочунун өтүнүчүн канааттандырган жок.

Эскерте кетсек, Азимжан Аскаровду 2011-жылы Кыргыз Республикасынын Жогорку Соту күнөөлүү деп таап, өмүр бою эркинен ажыраткан. Бул чечимге макул болбогон Азимжан Аскаров БУУнун Адам укуктары боюнча комитетине кайрылган. Ал комитеттин үстүбүздөгү жылдын 20-апрелинде чыгарган чечимине ылайык, Аскаровду абактан бошотуп, соттун өкүмүн жокко чыгаруу каралган. Мындан улам жаңы ачылган жагдайларга байланыштуу иш Жогорку Сотто кайрадан каралып, Жалал-Абад облустук сотунун 2010-жылдын 10-ноябрындагы өкүмү жана Жогорку Соттун 2011-жылдын 20-декабрындагы токтому жокко чыгарылган. Ошондой эле жазык ишти апелляциялык тартипте кароо үчүн Чүй облустук сотуна жиберүү чечими кабыл алынган.