Өзбекстанда президенттин милдетин аткаруучу Мирзийоев Каримовдун коопсуздугун камсыздоо максатында жабылган жолдорду ачууда

Ташкентте Ислам Каримовдун коопсуздугун камсыздоо максатында жабылган жолдор ачылууда. Бул тууралуу бүгүн, 6-октябрда жергиликтүү маалымат булактары жазып чыгышты.

Маалыматка ылайык, мамлекеттик резиденцияга жакын жайгашкан аймактардагы президенттин кортежи өтчү жолдор толугу менен ачыла баштаган. Жабылган жолдор жол тыгынын пайда кылып, айдоочуларга ыңгайсыздык жаратып келген.

Ташкентте Мустакиллик кең көчөсүнүн буга чейин жабылган бөлүктөрүн ачуу иштери башталган. Мындан сырткары Сайрам көчөсүнүн жабылган бөлүгүнүн ачылышы күтүлүүдө.

Эске салсак, президенттин милдетин аткаруучу Шавкат Мирзийоев Каримовдун убагында киргизилген чектөөлөрдү алууда. Буга чейин ырдоого уруксат берилбей келген ырчыларга уруксат берилип, мажбурлап пахта терүүчүлөр милдеттеринен кутулушкан.