Сузакта ачуу калемпир өстүргөн дыйкан түшүмүн Түркияга экспорттойт

Кыргыз эли "эр эмгегин жер жебейт" деген накыл кепти айтып келет. Канчалык мээнет кылып маңдай тер төксөң, анын акыбети кайтып, тапканың таттуу болот. Тилекке каршы, эл арасында оңой акчага азгырылып, башкалардын эмгегине көз арткандар, арам акча таап үй-бүлөсүн баккандар да жок эмес. Ошентсе да эл ичинде ак эмгеги менен акча таап, коомго үлгү болгондор басымдуулук кылат. Алардын катарын Сузак районунун Барпы айыл аймагында дыйканчылык менен алектенген Бакай Алиев толуктайт. Ал жетишкен ийгиликтери жөнүндө SUPER.KG порталына айтып берди.

Дыйкан быйыл 1 гектар жерге ачуу калемпир эгип, 6-7 тонна калемпир терип алган. Ал эми 20 сотых жерге помидор отургузуп, 10 тоннадан ашуун түшүм алган. Ошондой эле бадыраң өстүрүп, андан 2 тонна бадыраң жыйнап алганын айтты. Калемпирди сарайга, үйдүн чатырына жайып кургатарын кошумчалады.

"Өндүргөн калемпирди Түркияга сатууну пландап жатам, анткени алар мага кардар болуп, мен каалаган суммага сатып алганы жатышат. Калемпирге эч кандай химикат кошулмасы чачылган эмес. Германиянын технологиясы менен өстүрдүм. Быйыл Түркиядагы ишкерлер 1 килограмм калемпирди 20 сомго баалап жатышат. Бул сумма мага туура келди", - деди Алиев.

Чарба иштери менен алектенген дыйкан 5 гектар жерди ижарага алган. Жер иштетүү үчүн 70 миң сомдон ашуун чыгаша кылган. Ал эми орточо 400 миң сомдон ашуун киреше тапкан. Дыйкан тапкан кирешесинен аз камсыз болгон, ден соолугунун мүмкүнчүлүгү чектелгендерге жардам катарында бөлүп берет.