Бишкекте Азиз Мурадиллаевди колдогон кайрымдуулук концерти жана марафон өтөт

25-октябрда Бишкектеги Кыргыз драма театрында учурда ооруп жаткан актёр Азиз Мурадиллаевди колдогон кайрымдуулук акциясынын алкагында концерт жана марафон өтөт. Учурда акцияга катышарын бир топ чыгармачыл инсандар билдиришкен. Бул тууралуу SUPER.KG`ге актёр Камчы Сарыбаев кабарлады.

"Азиз Мурадиллаевди колдогон кайрымдуулук акциясынын алкагында концерт жана марафон өтөт. Спорт Ордосунда өткөрсө да болмок, бирок болбойт дегендей жооп узатышыптыр. Андыктан Азиз өзү иштеген Кыргыз драма театрында өткөрүүнү чечтик. Кыргыздын таланттуу жигити, актёр кесиптешибиз Азиз Мурадиллаевди колдоп кетиңиздер", - деп билдирди К.Сарыбаев.

Ошондой эле бүгүн, 6-октябрда операция жасатуу үчүн жардамга муктаж болгон актёрго банктан эсеп ачылды.

Белгилей кетсек, кечээ, 5-октябрда социалдык тармактарда "Актёр Азиз Мурадиллаевдин боорун алмаштыруу зарыл. Учурда ал жандандыруу бөлүмүндө. Биздин таланттуу кесиптешибиз Азизди сактап калууга көңүл кош эмес жарандардын баарын чакырабыз. 25-октябрь күнү Кыргыз драма театрында концерт жана марафон уюштурулат. Достор, артисттер, аткаруучулар, баарыңыздар үн катыңыздар. Баарыбыз жардам берели" деген билдирүү жазылып, бул постту кыргыздын белгилүү чыгармачыл инсандары бөлүшүшкөн.