Рамзан Кадыров уулдарынын мушташын сындаган Фёдор Емельяненкого жооп кайтарды

5-октябрда Чеченстандын Грозный шаарында эрежесиз мушташ боюнча "Grand Prix Akhmat-2016" мелдеши өткөн. Анда 8 бурчтукка Чеченстандын президенти Рамзан Кадыровдун 10 жаштагы уулу Ахмад, 9 жаштагы уулу Зелимхан жана 8 жаштагы уулу Адам да чыгып, жеңүүчү аталышкан. Жаш балдардын ден соолугуна залал келип жатканын, аларды бул куракта мушташтыруу жакшы эмес экенин Аралашкан мушташ өнөрлөрү боюнча кеңештин (ММА) президенти, атактуу мушкер Фёдор Емельяненко айтып чыккан.

Орусиялык спорт басылмаларынын башкы темасына айланган бул көрүнүш спорт сүйүүчүлөрүнүн эки жаатка бөлүнүүсүнө чейин жетти.

Фёдор Орусиянын аймагында 12 жаштан жогорку курактагы балдар гана октагонго чыга алышарын, алардын кошумча коргоочу кийимдерди кийүүсүнө катуу көңүл бурулуусу керектигин белгилеген. Чеченстандын президенти Рамзан Кадыров ага төмөнкүдөй жооп кайтарды:

"Фёдор Емельяненко Чеченстанга келип, "Grand Prix Akhmat-2016" мелдешине күбө болуп, балдар жана өспүрүмдөр менен кантип иштеп жатканыбызга күбө болсо, мелдеш тууралуу жакшы пикирлерин айтып, аягында жаш балдардын мушташын кемчилик катары айтса, мен анын сөзүн башкача кабыл алмакмын. Фёдордун биздин мелдешке тиешеси жок сүрөттү баракчасына жайгаштырып, иретсиз сөздөрдү жазганы этикага жатпайт. Чеченстанда бир дагы балдар үйү жок. Мамлекеттик программанын негизинде биз болочоктогу Орусиянын патриотторун жана коргоочуларын тарбиялап жатабыз. Чеченстанда балдарга карата көрсөтүлгөн кордук боюнча сөз кылуу мүмкүн эмес, себеби бизде балдарга кордук көрсөтүлбөйт, андай фактылар чанда катталат. Фёдор, сиз жаңылыштык кылдыңыз. Орус баатырлары мындай кадамга барышпайт".