АКШдагы "Мэттью" бороонунан жабыркагандардын арасында Кыргыз Республикасынын жарандары жок

АКШдагы "Мэттью" бороонунан жабыркагандардын арасында Кыргыз Республикасынын жарандары жок. Бул тууралуу бүгүн, 8-октябрда Кыргыз Республикасынын АКШдагы элчилигинен билдиришти.

Маалыматка караганда, элчилик Флорида штатында жашаган кыргыздар менен байланышкан. Анда алар бороондун негизги коркунучтары өтүп кеткенин, шаардан чыгып кетүү чакырыктарына карабай үйүндө эле болушканын билдиришкен.

Учурда "Мэттью” деп аталган бороон АКШнын чыгыш деңиз жээгине жакындап келе жатат. Мындан улам Барак Обама Жоржия штатында өзгөчө кырдаал режимин жарыялаган. Буга чейин мындай режим Флорида жана Түштүк Каролина штаттарында жарыяланган эле.

Алдын ала маалыматтарга таянсак, АКШда бороондун кесепетинен бир канча адам жабыркап, айрымдары дайынсыз болууда. Ал эми Гаити өлкөсүндө каза болгондордун саны 900гө жетти.