Лира Чолпонбаева: "Ак кан менен ооруган балама кайрымдуулук концертин өткөргөндөр акчабызды бербей качып жүрүшөт"

"Ак кан менен ооруган балама кайрымдуулук концертин өткөргөндөр акчабызды бербей 4 айдан бери качып жүрүшөт", - дейт Лира Чолпонбаева. Ал бүгүн, 10-октябрда SUPER.KG порталына буларды айтып берди: "Менин балама жардам беребиз деп кайрымдуу адамдардын терисин жамынган "Бакыт нуру" коомдук кайрымдуулук фонду 4 айдан бери алдап, акчабызды бербей жүрөт. Бул концерт 31-май күнү Бишкектеги Спорт Ордосунда жалгыз менин балам үчүн өткөн. Концерттин өтүшүнө мен да салым кошуп, билеттерди сатууга жардам көрсөткөм. Жалгыз мен 62 миң сомдук билет сатып бергем".

Акыйкат издеген эне 1-Май РИИБине арыз менен кайрылган. Райондук укук коргоочулар алданган энеге 5-сентябрда "кылмыштын курамы жок" деген чечим чыгарып беришкен. Ал эми Спорттук курулмалар жана спорттук камсыздоо башкармалыгы мамлекеттик ишканасы 31-май күнү "Бакыт нуру" коомдук кайрымдуулук фонду тарабынан кайрымдуулук концерти өткөндүгүн тастыктаган тактама берген. Ошол эле учурда жабырлануучу Лира Чолпонбаева "Бакыт нуру" коомдук кайрымдуулук фонду менен кагаз жүзүндө келишим түзгөн эмес.

"Бакыт нуру" коомдук кайрымдуулук фондунун төрайымы "жеримди сатып берем, балдар акчаны иштетип жиберишиптир" деген эле. Минтип тил эмизгенине 4 ай болду. Балама дарыга акча керек болуп кыйналып кеттим. Бир жолку дарылануусуна 30 миң сом каражат жумшалат. Өзүм ашканада эмгектенем", - деп кошумчалады Чолпонбаева.

Талас облусунун тургуну Медер Медет уулу 24 жашта. Ал эки жылдан бери ак кан оорусу менен күрөшүп келет.

"Бул концертке мен да билет сатышкам, анткени Лира Чолпонбаева менин кудагыйым болот. Аларга жардам берейин дегем. Бизге 1-Май РИИБинин тергөөчүсү Бекжан Таалайбеков акчаны өндүрүп берерин айткан эле, бирок акчабыз өндүрүлгөн жок", - деп билдирди Гулина Сарыбаева.

Маалыматка ылайык, аталган кайрымдуулук концертине Кайрат Примбердиев. Акбар Сүйүнбаев, Аяна Касымова, Айчүрөк Султанова, Бакыт Мамаев, "Маржан" тобу катышкан.