"Бакыт нуру" кайрымдуулук фонду: "Ак кан менен ооруган балага арналган концерт өзүн актабай калган"

Ак кан менен ооруган балага арналган концерт толук кандуу өтпөй калган. Бул тууралуу бүгүн, 10-октябрда SUPER.KG порталына "Бакыт нуру" коомдук кайрымдуулук фондунун директору Анара Эгембердиева билдирди.

"Кайрымдуулук концерти өткөрүлгөн, бирок билеттердин көбү сатылбай, өтпөй калган. Спорт Ордосунун ижарасына 30 миң сом, музыканттарга 15 миң сом, мындан сырткары каражатты башка чыгымдарга жумшадык. Лира Чолпонбаева мени туура түшүнүп турса жакшы болмок. Азыркы убакта мен чанда кездешүүчү коркунучтуу дартка кабылып, дарыланып жатам. Мен сөзсүз ак кан менен ооруган балага акчасын төлөп берем. Бул үчүн убакыт керек болуп жатат. Бул менин моюнумдагы карыз", - деп билдирди Эгембердиева.

"Бакыт нуру" коомдук кайрымдуулук фондунун директорунун маалыматына ылайык, Лира Чолпонбаевага буга чейин 14 миң сом берилген. Келишим боюнча дагы 62 миң сом каражат төлөп беришмекчи.

Эске салсак, 10-октябрда Лира Чолпонбаева "ак кан менен ооруган балама кайрымдуулук концертин өткөргөндөр 4 айдан бери акчамды бербей качып жүрүшөт" деп билдирген.