Футболчу Бактияр Дүйшөбеков түркиялык клуб менен келишим түздү

Футболчу Бактияр Дүйшөбеков түркиялык "Эгидирспор" футболдук клубу менен 1 жылдык келишим түздү. Бул тууралуу футболчу SUPER.KG порталына билдирди.

Буга чейин канттык "Абдыш-Ата", андан кийин беларустук "Крумкачи" клубунда ойногон футболчу бул чечимин көбүрөөк майданга чыгуу үчүн кабыл алганы менен түшүндүрдү. "Команда күчтүү оюнчуларды алыптыр. Учурда аймактык лигада чемпиондукту утуп, профессионалдык лигага көтөрүлүү мүмкүнчүлүгү жогору экен. Клубдун курамында 1 жыл ойнойм", - деди футболчу.

Кошумчалай кетсек, беларустук клубда ойноп жаткан Дүйшөбеков акыркы учурларда башкы курамга кирбей, майданга баштагыдан азыраак чыгып калган. Клубдагы кырдаал боюнча жарым коргоочу буларга токтолду: "Мен "Крумкачиде" өзүмдү жетиштүү деңгээлде көрсөттүм деп ойлойм, бирок машыктыруучулар мага ишеним көрсөтпөй коюшту. Ошол себептүү клубдан кетүү чечимин кабыл алдым".