Бүгүн Азимжан Аскаровдун соту уланат

Чүй облустук сотунун соттук коллегиясы 4-октябрда Азимжан Аскаровдун ишин карап баштаган. Анда айыпталуучу, жабырлануучу жана күбөлөр суракка алынышкан. Ошондой эле жактоочу айыпталуучуну абактан бошотуу өтүнүчүн келтирген, бирок сотттук коллегия ал өтүнүчтү канааттандырган эмес. Сот ишин кароо Бишкектеги Жаза аткаруу кызматынын Күзөт жана кайтаруу департаментинде бүгүн да уланат.

Эскерте кетсек, Азимжан Аскаровду 2011-жылы Кыргыз Республикасынын Жогорку Соту күнөөлүү деп таап, өмүр бою эркинен ажыраткан. Бул чечимге макул болбогон Азимжан Аскаров БУУнун Адам укуктары боюнча комитетине кайрылган. Ал комитеттин үстүбүздөгү жылдын 20-апрелинде чыгарган чечимине ылайык, Аскаровду абактан бошотуп, соттун өкүмүн жокко чыгаруу каралган. Мындан улам жаңы ачылган жагдайларга байланыштуу иш Жогорку Сотто кайрадан каралып, Жалал-Абад облустук сотунун 2010-жылдын 10-ноябрындагы өкүмү жана Жогорку Соттун 2011-жылдын 20-декабрындагы токтому жокко чыгарылган. Ошондой эле жазык ишти апелляциялык тартипте кароо үчүн Чүй облустук сотуна жиберүү чечими кабыл алынган.