Министр Замирбек Айдаров кытайлык компаниянын Лексус унаасын шашылыш түрдө ээсине кайтарып берди

Жакында транспорт жана жол министри Замирбек Айдаровдун кытайлык компаниянын унаасын пайдаланып жүргөнү тууралуу маалымат жарыяланган. Транспорт жана жол министрлиги 10-октябрда министр чын эле кытайлык "Чайна Роуд энд Бридж Корпорейшн" компаниясынын Лексус 570 автоунаасын колдонуп жүргөнүн тастыктады. 2015-жылдын июль айында министрлик менен аталган компаниянын ортосунда Лексус 570 унаасын убактылуу пайдалануу жөнүндө келишим түзүлүптүр. Ага ылайык, министр унааны 1 жылдан ашык убакыттан бери каалагандай пайдаланып жүргөн.

Ал эми парламентте "Өнүгүү-Прогресс" фракциясынын лидери Бакыт Төрөбаев министрдин өлкөдө ири жолдорду куруп жаткан компаниянын унаасында жүргөнүн сындап, фактыны териштирүү, иликтөө учурунда Айдаровду кызматтан убактылуу четтетүүнү өкмөт башчыга сунуштады. Бирок министрлик менен компаниянын ортосундагы келишимдин мөөнөтү күтүүсүз аяктап, унаа тезинен компанияга өткөрүлүп берилгени шек жаратты. Министр менен компаниянын ортосунда жеке кызыкчылыктар барбы?

Белгилей кетсек, "Чайна Роуд энд Бридж Корпорейшн" компаниясы - Бишкек-Нарын-Торугарт, Түндүк-Түштүк альтернативдүү жолун куруп жаткан ишкана.