Азимжан Аскаровдун иши боюнча сот отурумун видеого тартууга тыюу салынды

Бүгүн, 11-октябрда Азимжан Аскаровдун иши каралууда. Алгач мамлекеттик айыптоочу сот отурумун видеотасмага түшүрүүгө тыюу салуу өтүнүчүн келтирди. Ага жактоочулар да, жабырлануучулар да каршылык билдиришкен жок. Мындан улам соттук коллегия ордунан кеңешип, өтүнүч канааттандырылды.

Эскерте кетсек, Азимжан Аскаровду 2011-жылы Кыргыз Республикасынын Жогорку Соту күнөөлүү деп таап, өмүр бою эркинен ажыраткан. Бул чечимге макул болбогон Азимжан Аскаров БУУнун Адам укуктары боюнча комитетине кайрылган. Ал комитеттин үстүбүздөгү жылдын 20-апрелинде чыгарган чечимине ылайык, Аскаровду абактан бошотуп, соттун өкүмүн жокко чыгаруу каралган. Мындан улам жаңы ачылган жагдайларга байланыштуу иш Жогорку Сотто кайрадан каралып, Жалал-Абад облустук сотунун 2010-жылдын 10-ноябрындагы өкүмү жана Жогорку Соттун 2011-жылдын 20-декабрындагы токтому жокко чыгарылган. Ошондой эле жазык ишти апелляциялык тартипте кароо үчүн Чүй облустук сотуна жиберүү чечими кабыл алынган.