Эки баласы менен кетип бараткан келинди сүзүп, анын өлүмүнө себепкер болгон айдоочу 3 аптадан бери изделүүдө

Мындан 3 апта мурун Бишкекте 2 баласы менен кетип бараткан келинди сүзүп, анын өлүмүнө себепкер болгон айдоочу табыла элек. Бул тууралуу бүгүн, 11-октябрда SUPER.KG порталына Бишкек шаарынын Патрулдук милициясынын басма сөз катчысы Таалай Бугубаев билдирди.

"Кылмышка шектүү Рустам Жалилов табыла элек. Аны издөө иштери улантылууда", - деди Бугубаев.

Эске салсак, жол кырсыгы 21-сентябрда саат 17:30 чамасында Бишкектин түштүк-батыш тарабындагы көрүстөндүн жанында орун алган. Анда жол тандабас башкарган Р.Жалилов аттуу айдоочу жолдо 2 баласы менен кетип бараткан 23 жаштагы келинди сүзүп, окуя болгон жерден изин жашырып кеткен. Арадан көп өтпөй аталган айдоочу дагы бир жаранды сүзүп, андан соң май куюучу жайдын тосмосун сүзүп токтогон. Оор жаракаттарды алган жаш эне ооруканага жетпей каза тапкан. Ал эми кылмышка шектүү май куюучу жайды сүзгөн соң ал жерден да кетип, 22-сентябрга караган түнү Казакстанга өтүп кеткен.