Жасалма 300 сомдук банкноттун пайда болгонунан улам Улуттук банк жасалма акчадан сак болууга чакырды

Улуттук банк калкты жасалма акчадан сак болууга чакырат. Бул маселе өлкөнүн түштүгүндө белгисиз бирөө сатуучуга Чыңгыз Айтматовдун элеси түшүрүлгөн 300 сом бергени белгилүү болгондон кийин көтөрүлдү.

Банк өлкө аймагында улуттук валюталар катары 20 сом, 50 сом, 100 сом, 200 сом, 500 сом, 1000 сом жана 5000 сомдук номиналдар гана сунушталарын белгилейт.

Башта "Ч.Айтматовдун элеси түшүрүлгөн 300 сомдук банкноттун эскизин иштеп чыгуу боюнча дизайнерлер арасында сынакка катышкан" деген божомол айтылган. Улуттук банк 300 сомдук банкнот сынактарга катышпаганын белгиледи.

"Эгерде шек жаратуучу банкнот көрсөңүздөр, Кыргыз Республикасынын Өкмөтүнө караштуу Экономикалык кылмыштар менен күрөшүү боюнча кызматка же Улуттук банкка кайрылууну сунуштайбыз. Ал жерден адистер банкнотко экспертиза жүргүзүп, анын нактыгын аныктап алуусу керек. Шек жараткан банкнотту сатууга аракет жасабаңыздар, анткени жасалма акчаны чыгаруучулар сыяктуу эле аны таркатуучулар дагы мыйзамга жараша жоопко тартылышат", - деп жазылат маалыматта.

Кылмыш кодексинин 198‑беренесине ылайык, жасалма акчаны чыгаруу, сактоо же сатуу аракеттери үчүн 3 жылдан 5 жылга чейин эркинен ажыратуу жана мүлкүн мамлекеттин пайдасына тартып алуу каралат. Ушул эле кылмыштар ири көлөмдө жана бир нече адамдын тобу менен жасала турган болсо, мүлкүн конфискациялоо менен 10 жылдык мөөнөткө чейин эркинен ажыратылат.