Кенже Дүйшеева жеке концертин патриоттук ыр менен жыйынтыктады

21:45. Кенже Дүйшеева жеке концертин патриоттук ыр менен жыйынтыктады. Ырчы концерт өткөрүүгө салымын кошкон ар бир адамга, келген көрүүчүлөргө ыраазычылык билдирди.

21:30. Кенже Дүйшеева "Таптым" жана попурри чыгармаларды аткарды. Учурда "Жебе" тобу менен "Келчи, жаным" чыгармасын аткарууда.

21:15. Кенже Дүйшеева: "Көч бара-бара түзөлөт. Андыктан жаңыдан түптөлүп келе жаткан, кыздардан түзүлгөн топту тааныштырууга уруксат этиңиздер. Негизи, кыздардан турган топ түзбөйм деген элем". Кече ээси сахнага "Булбул" тобунун кыздарын чакырды. Ошондой эле кыздар алгачкы ирет сахнага чыгышканын, топтун аты бүгүн элге тааныштырылып жатканын кошумчалады. Эки кыздан түзүлгөн топ өз репертуарындагы чыгармаларын тартуулады.

21:10. Концертте кичүү уулун үйлөнтө албай жүргөн эне, анын колундагы келиндери тууралуу сахналаштырылган көрүнүш көрсөтүлдү. Андан соң сахнага Кенже Дүйшеева чыгып, "Келинчек" ырын аткарды. Кайненин образын жараткан Сакиш (Айнура Турганбаева) "Келиним сендей болсун!" деп ырчыга ийгилик каалады.

20:55. Учурда келиндер тууралуу сахналаштырылган көрүнүш көрсөтүлүп жатат.

20:50. Ырчы "Тумарым" ырын аткарды. "Кээ бири байлыгың барда дос болот, бийлигиң барда дос болот. Бирок чыныгы достор башыңа кыйынчылык түшкөндө гана билинет" деген ырчы "Аллага кат" ырын ырдап жатат.

20:35. Дархан Дүйшенов "Жамийла" аттуу чыгармасын аткарды. Андан соң сахнага кайрадан бийчилердин коштоосунда Кенже Дүйшеева чыкты. "Замандаш" ырын ырчы бийлеп ырдап жатты. Учурда "Апа" жаңы чыгармасы ырчынын аткаруусунда жаңырууда.

20:25. Кеченин коногу казак ырчысы Дархан Дүйшенов ырдап жатат. Ырчы концертке чакырган Кенже Дүйшеевага ыраазычылыгын билдирип, туулган күнү менен куттуктады.

20:15. "Жебе" тобу түзүлүп бүткөн учурда дагы бир кыз бул дүйнөгө келүүгө даяр болуп калган экен. Ал кичинекей кыз менен азыр чогуу ырдайбыз" деген ырчы сахнага өзүнүн кызы Томиристи чакырды. Экөө аткарган дуэт чыгарманы көрүүчүлөр кол чабуулар менен колдоп турушту. Андан соң ырчынын "Аялзат" ырына "Жылдын ыры" наамы ыйгарылды.

20:00. Учурда "Жебе" тобу Кенже Дүйшеева менен бирге "9 жаш" ырын аткарууда. "Топтун түзүлгөнүнө 5 жыл болду. Жаңы түзүлгөндө көп сын-пикирлер айтылды. Жөжөнү күздө санайбыз деп сөздөргө көңүл бурган жокмун. 5 жыл аралыгында көп кыйынчылыктарды башыбыздан өткөрдүк. Келиндүү, неберелүү болдум", - деген ырчы топтун жигиттерине кыскача мүнөздөмө берип кетти. Учурда Кенже Дүйшеева "Сагыныч" ырын Жумагүл Раимжан кызы менен аткарууда.

19:50. Кенже Дүйшеева "Ош шаарым" аттуу жаңы чыгармасын аткарган соң сахнага ырчынын окуучулары, "Жебе" тобунун жигиттери чыгышты. Гүлдесте кармаган жигиттер "Аялзат" ырын ырдап, "бизди ушул даражага жеткирген Кенже эжекебизге ыраазычылык билдиребиз" деп гүлдөрүн ырчыга тапшырышты. Андан кийин "Жебе" тобу өздөрүнүн репертуарындагы "Балалык" ырын ырдашты.

19:35. Сахнага ырчынын күйөрмандары чыгып, туулган күнү менен куттукташты. "Кенже Дүйшеева "Кыз-Бурак" тобунан суурулуп чыкты. Дайыма эл кызматында жүрөт. Кыргыздын мыкты кыздарынын бири, үй-бүлөсү менен бактылуу болсун, чыгармачылык ийгиликтер коштосун" деген каалоо-тилектер айтылды. Ырчы кыргыз эли кандай кыйынчылык болбосун ар тараптан колдоп турганын айтып, ыраазычылыгын билдирди. Учурда "Өтүнүч" аттуу жаңы чыгармасын аткарууда.

19:25. Бүгүн, 12-октябрда Токтогул Сатылганов атындагы Кыргыз улуттук филармониясында Кенже Дүйшееванын жеке концерти белгиленген убакыттан 15 мүнөт өтүп башталды. Кечени кыргыз бийин бийлеген бийчилер ачышты. Андан соң алып баруучу сахнага кеченин ээси менен "Жебе" тобун чакырды. Учурда Кенже Дүйшеева ырдап жатат.