Бишкекте кол алдындагыларды "сойкуларга тийишпегиле" деп урушкан милиция кызматтан алынды

Бишкекте кол алдындагыларды "сойкуларга тийишпегиле" деп урушкан милиция кызматтан алынды. Бул тууралуу бүгүн, 13-октябрда Бишкек шаардык ички иштер башкы башкармалыгынан билдиришти.

Маалыматка караганда, Бишкек шаарындагы №10-милиция бөлүмүнүн Коомдук тартипти сактоо башкармалыгынын жетекчиси Пардабай Намазбаевге алгач катуу сөгүш берилген. Кийин Ички иштер министрлиги кызматтык иликтөө жүргүзүп, жыйынтыгында ал кызматтан алынган.

Айта кетсек, мындан үч күн мурун интернет колдонуучуларынын бири Фейсбуктагы баракчасына видео жайгаштырган. Видеодо Бишкектеги милиция бөлүмдөрүнүн биринин жетекчиси кол алдында иштеген кызматкерди “Канча айтам, бул сойкуларга тийишпегиле деп?! Чалсам албайсыңар, силер атайын жасап жатасыңарбы?” деп урушуп жатканы чагылдырылган.