Табыптын дарылоосунан кийин каза тапкан 6 жашар бала эгиздин түгөйү болгон

Бишкекте табыптын дарылоосунан кийин каза тапкан 6 жашар баланын өлүмү боюнча кылмыш ишин козгоо маселеси экспертизанын жыйынтыгы чыккан соң каралат. Бул тууралуу бүгүн, 14-октябрда SUPER.KG порталына Бишкек шаардык ички иштер башкы башкармалыгынын басма сөз катчысы Олжобай Казабаев билдирди.

Маалыматка ылайык, каза болгон 6 жашар бала псориаз оорусу менен жабыркачу. Баланын ата-энеси 80 жаштагы табыпка жардам сурап кайрылышкан. Табып баланы дарылагандан кийин анын абалы оорлошуп, ал Шаардык №3-балдар ооруканасына түшүп, кийин каза болуп калган.

"Табып баланы көк таш менен дарылагандан кийин баланын абалы оорлошуп, ал ооруканага түшкөн. Ооруканага бала оор абалда келген, дарыгерлер көрсөткөн медициналык жардамга карабай эс-учун жоготуп, каза болуп калган. Ошол эле күнү, 11-октябрда соттук-медициналык экспертиза дайындалган. Анын жыйынтыгы менен кылмыш ишин козгоо маселеси каралмакчы. Иликтөө иштеринин алкагында табып акыркы 15 жылдан бери балдарды дарылоо менен алектенгени аныкталган. Ал эми көз жумган бала эгиздин түгөйү экени маалым болду", - деди Казабаев.

Маалымат үчүн: Псориаз - көп кездешүүчү тери ооруларынын бири. Организмдин иммундук системи бузулганда, психо-эмоционалдык факторлор жабыркаганда, эндокринологиялык ооруларга чалдыкканда же бөйрөк, боор ооруганда псориаз калыптанышы мүмкүн. Ал көбүнчө чыканакта, тизеде, баштын чач өскөн жерлерине кызыл так болуп чыгат да, ушаланып, түлөп, карт сыяктуу болуп турат. Псориаз болгондо териден сырткары сөөктөр жана муундар дагы жабыркайт. Маалыматтарга караганда, оору тукум кууйт.