Орусияда октон жабыркаган кыргыз жаранынын абалы орто

Орусияда октон жабыркаган кыргыз жаранынын абалы орто. Бул тууралуу Кыргыз Республикасынын Орусиядагы элчилигинен бүгүн, 14-октябрда билдиришти.

Маалыматка караганда, жабыркаган жаран учурда Склифосовский атындагы Тез жардам институтунда дарыланууда. Абалы ортодон жогору.

Айта кетсек, окуя 10-октябрь күнү саат 16:00 чамасында Москва шаарындагы көп кабаттуу үйлөрдүн биринде болгон. Анда короодо 4 адам спирт ичимдиктерин ичип, бөтөлкөсүн короодо токтоп турган унаалардын биринин үстүнө коюшкан. Унаанын ээси үйүнүн терезесинен аларды көрүп, бөтөлкөнү алып коюусун айтып эскертүү жасаган. Мындан майнап чыкпагандыктан, ал куралын алып, 4 адам менен сүйлөшүүгө чыккан. Сүйлөшүүдөн уруш чыгып, унаанын ээси отургандардын бирин – 34 жаштагы Мирбек Сырымбетов аттуу Кыргыз өлкөсүнүн жаранын тапанчасы менен атып салган. Ок тийген адам оор абалда ооруканага жеткирилген. Ок чыгарган адам Орусиянын Өзгөчө кырдаалдар министрлигинин пенсиядагы кызматкери экени аныкталган.