Курал Чокоев жеке концертин шаңдуу ырлары менен жыйынтыктады

20:15. "Кокон гилас" ыры менен ырчы жеке концертин жыйынтыктады. "Биз сиздер менен коштошпойбуз. Болгону "Көрүшкөнчө!" деп айтабыз", - деген Курал Чокоев концертин өткөрүүдө колдоо көрсөткөндөрдү эл менен тааныштырды. Күйөрмандарына, дос-жакындарына ыраазычылыгын билдирип, ырчы концертин аяктады.

20:10. Шляпасыз Куралга окшобой каларын айткан ырчы баш кийимин кийип, "Жаным" деген ырын ырдады. Андан соң "Автобус" жана башка шаңдуу чыгармаларын аткарды.

20:00. "Студент кезде болгон акчамды топтоп жаздырган ырым бар. Ыр радиолордон жаңырып, чыгармачылыгым ошол кезде башталган. Ал ырды ырдабай койсом өзүмдү алдаган болом", - деген ырчы "Мени кечир" чыгармасын Айбек Бакытбеков менен алгач англисче, анан орусча аткарды.

19:55. Атайын Кубадан келген жигит менен ырчы испанча чыгарма аткарууда.

19:45. "Ата-эне" ырын аткарган соң залда отурган энесине ушундай даражага жеткирип, тарбиялап өстүргөнү үчүн ыраазычылыгын билдирди. Дайыма бекем ден соолукта жүрүшүн, узак өмүр сүрүшүн айтып, гүл сунду. Андан кийин үйлөнгөн, жакында үйлөнө турган досторуна үй-бүлөлүк бакыт каалап, сүйүшкөндөргө арналган чыгармасын аткарды.

19:30. Попурри, "Мекеним" аттуу чыгармаларынан соң Курал Чокоев Абидин Темиров менен бирге "Ала-Тоо" чыгармасын аткарды. Абидин Темиров ырчыга чыгармачылык ийгилик каалап, бүгүнкү концерти менен куттуктап өттү. Андан соӊ кийинки чыгармасы ата-энесине, жалпы эле ушул залда отурган бардык ата-энелерге арналарын айткан Курал Чокоев "Ата-эне" чыгармасын ырдап жатат.

19:15. Ырчылар Добр, Кайрат Примбердиев Курал Чокоевдин концертине ийгилик каалап, ырларын тартуулашты. "Кайрат Примбердиев ырчы гана эмес, мыкты бийчи дагы. Андыктан залды дайыма шаңга бөлөйт", - деген Курал Чокоев ырчыга ыраазычылыгын билдирди.

19:05. Курал Чокоев сахнада Ильяз Андаш менен бирге "Сейдакматтын ырын" аткарды. Чыгарманы күлкү жаратуучулар коштоп, залдагы элди аралап көңүлдүү маанай тартуулашты. Андан соң рэп ырчысы Добр чыкты.

18:50. Курал Чокоев элге белгилүү бир нече чыгармаларын тартуулады. Ырчынын ар бир чыгуусун бийчилер коштоп жатышат. Ырчы концертке келген күйөрмандарына жагымдуу маанай каалап, жакшы эс алып кетүү тилегин билдирди.

18:40. Бүгүн, 15-октябрда Бишкектеги Улуттук филармонияда ырчы Курал Чокоевдин жеке концерти башталды. Алгач бийчилер өнөрүн тартуулашты. Андан соң элдин кол чабууларынын коштоосунда кеченин ээси чыгып, концертти "Менин айылым" аттуу ыры менен баштап берди.