Банктарды кайра уюштуруу агенттиги банктардын бирине таандык болгон Toyota Prado унаасын пайдаланууда

Маалыматка ылайык, депутат Дастан Бекешев карыздарды кайра түзүмдөштүрүү жана банктарды кайра уюштуруу "ДЕБРА" агенттигинин аудитин эскертти. Эсептөө палатасы жарыялаган документте агенттиктин директору улутташтырылып жана банкрот болгон "Азия универсал банктан" алынган Toyota Prado унаасын айдап жүргөнү жазылган. Агенттиктин директору Саидбек Зулпуев бул маалыматты тастыктап, унаа аталган банктын начар активдери катары агенттиктин карамагына өткөнүн билдирди.

Дастан Бекешев жакшы баага сатып, карыздардын бөлүгүн жабууга мүмкүн болгон унаанын кандайча начар активдердин катарына туруп калганын сурады. Саидбек Зулпуев сот улутташтырылган банкты бөлүү чечимин чыгарган соң унаа аларга тийгенин айтат. "Азия универсал банктын" активдерин бөлүү тууралуу соттук отурумдан кийин бул унаанын турган жери жазылган кат менен ачкычты бизге салып жиберишиптир. Биз унааны таптык, ошондон бери ал биздин эсепте", - дейт Зулпуев.