Сауд Арабиянын бийлиги канзаада Турки бен Сауд аль-Кебирди өлүм жазасына тартты

Монархиянын тарыхында биринчи жолу падышалык үй-бүлөнүн мүчөсү, Сауд Арабиянын канзаадасы Турки бен Сауд аль-Кебир өлүм жазасына тартылды. Бул тууралуу кечээ, 18-октябрда чет элдик маалымат каражаттары жазып чыгышты.

Маалыматка караганда, канзаада 3 жыл мурун киши өлтүргөндүгү үчүн падышанын уруксаты жана буйругу менен өлүм жазасына тартылды.

“Турки бен Сауд аль-Кебир 3 жыл мурун Аль Тумама районундагы массалык урушта өзүнүн досун атып, күнөөлүү деп табылган. Ал окуя болгон жерге полиция кызматкерин өзү чакырып, кармалган. Сауд Арабиядагы шарият мыйзамы боюнча, киши өлтүрүү, баңгизатын контрабандалоо, куралдуу карактоо, зордуктоо жана Кудайга жана динге байланышкан туура эмес аракеттерди жасаган адамга өлүм жазасы берилет. Өткөн жылы Сауд Арабияда 158 адамды өлүм жазасына тартуу өкүмү чыккан. Ал эми быйылкы жылдын эсеби боюнча канзааданын өлүмү 134-болуп эсептелет”, - деп жазылат маалыматта.