Элге курттаган ун сатылган-сатылбаганын депутаттык комиссия иликтейт

Өкмөттүк органдар элге курттаган ун саткан-сатпаганын депутаттык комиссия иликтейт. Жогорку Кеңеште 20-октябрда курттаган ун боюнча фактыны иликтөө жана өкмөткө караштуу Мамлекеттик материалдык резервдер фонду тарабынан ундун таратылганы жөнүндө маалыматтарды текшерүү үчүн депутаттык комиссия түзүлдү. Комиссиянын курамына Жогорку Кеңештеги 5 фракциянын өкүлдөрү киришти: “Республика-Ата Журттан” Жыргалбек Турускулов, Акылбек Жамангулов, Бактыбек Райымкулов, "Кыргызстандан" Дастан Жумабеков, Айтмамат Назаров, КСДПдан Улан Примов, Эльвира Сурабалдиева, Узарбек Жылкыбаев, Музаффар Исаков, “Өнүгүү-Прогресстен” Абылкайыр Узакбаев, "Ата Мекенден" Бахадыр Сулейманов.

Белгилей кетсек, Жогорку Кеңештин 22-сентябрдагы жыйынында депутат Жыргалбек Турускулов Мамлекеттик материалдык резерв фонду курттаган унун карылар үйлөрүнө жана жетим-жесирлерге 16 сомдон сатып жатканын айтып чыккан. "Мекеменин кампасында дагы 70 тонна ун калды" деген маалымат бар экенин да билдирген эле. Мамлекеттик материалдык резервдер фонду айтылган маалыматтарды четке каккан.