Соодагер: "Сары-Өзөн" базарына кетерибизди билген "Дыйкан" базарынын администрациясы бизге кысым көрсөтүп жатат"

Мамлекеттик экологиялык жана техникалык инспекция Бишкектеги "Дыйкан" базары талапка жооп бербегенин аныктагандан кийин аталган базар жабылмай болгон. "Дыйканда" иштеген соодагерлер "Дордой-Моторс" жана "Сары-Өзөн Дыйкан" базарларына көчүрүлмөк. Бүгүнкү күндө базар жабылбай, соодагерлер ишин улантып жатышканы белгилүү болду. Башка базарга көчүп кетүүнү көздөгөн соодагерлерге администрация тарабынан кысым болуп жатканын соодагер Гүлмира Алиева бүгүн, 21-октябрда болгон жыйында билдирди.

"Биз толук кандуу иштей элек "Сары-Өзөн" базарынан соода орунун алганбыз. Базар иштегенче "Дыйканда" иштеп жатканбыз, бирок базардын администрациясы контейнерибизди жаап салды. Бизге кысым болуп жатат", - дейт Гүлмира Алиева.

Маалыматка ылайык, "Дыйкан" базары 2008-жылдан бери иштейт. Ал эми соодагер Гуля Курамаева "Дыйкан" базарынын жабылышына каршы экенин билдирди.

"Базардын администрациясы биз үчүн жакшы шарт түзүп берген. "Базарда унаа тыгыны жаралат" дегени калп. Учурда базар тазаланды. Кечээ, 20-октябрда Ак үйдүн алдына президентке, Жогорку Кеңешке анын жабылбашын талап кылып, тынчтык митингине өз ыктыярыбыз менен 100 адам чыктык", - дейт Гуля Курамаева.

"Дыйкан" базарында 700гө жакын адам иштейт.