Дима Билан Кайрат Примбердиевди "Голос" долбоорунан кетирбей өз тобуна алып, ырчыны "сактап калды"

Ырчы Кайрат Примбердиев орусиялык "Голос" долбоорунда Леонид Агутиндин тобуна кабыл алынган эле. Кечээ, 21-октябрдагы көрсөтүүдө мекендешибиз Владислав Венгли менен Майкл Жексондун "Black and White" чыгармасын аткарган. Леонид Агутин эки ырчынын бирөөсүн алып калып, экинчисин сынактан четтетиши зарыл эле. Агутин Венглини тандаган. Кайрат Примбердиев долбоордон четтей турган болгондо калыстар тобундагы Дима Билан өз тобуна кошуп алды. Бул тууралуу SUPER.KG'ге ырчынын менеджери Эльвира Примбердиева билдирди.

"Негизи, башында эле Кайратка Биландын тобуна барууну сунуштаганбыз. Бирок анын тобунда 14 адам болуп, толуп калгандыктан барган эмес. Билан Кайрат ырдап бүткөндөн кийин "Жакшы ырдадың, азамат!" деп өз баасын айтып турган. Сынакта негедир тиги ырчыга тартып койгондой, Кайратты атайын сынактан четтетип жаткандай болду. Же ал ырчынын тааныштары көп беле, түшүнүксүз. Интернетте да туура эмес чечим болгонун айтып жатышат. Эмне болсо да азыр Кайрат Биландын тобуна кошулду. Кийинки көрсөтүүгө тартылууга ноябрь айынын башында кетет", - деди Эльвира Примбердиева.

Ошентип, мекендешибиз Кайрат Примбердиевдин үнүн "Голос" телеберүүсүнөн улантып угабыз. Орус музыка сүйүүчүлөрү Леонид Агутинди сындап, Диманы "баракелде, талантты сыйлайт экен" деп баалашууда.