Бишкекте актёр Азиз Мурадиллаевди колдоо максатында концерт өттү

Бүгүн, 25-октябрда Т.Абдумомунов атындагы Кыргыз улуттук драма театрында белгилүү актёр Азиз Мурадиллаевди колдоо максатында концерт-марафон өттү. Азиз Мурадиллаевдин жакшы болуп кетүүсүн каалаган көрүүчүлөргө ырчылар Нэна, Урмат Усенов жана Неля, Нурсултан Азыкбаев, "Дем" театрынын актёрлору жана башка чыгармачыл инсандар өз өнөрлөрүн тартуулашты.

Актёрдун жубайы Эльвира Жумалиева жолдошунун абалы тууралуу буларга токтолду:

"Азизге Москвада биринчи операция ийгиликтүү жасалды. Эртең мекенге кайтып келет. Алдыда дагы эки операция бар. Үч донор табылды, бирок индиялык дарыгерлер бир туугандары донор болушу керектигин айтып жатышат. Сиздер билгендей, Азиз жалгыз бала, атасы да каза болуп калган. Апасы 60тан ашып калган, тун уулубуз сарык болуп ооругандыктан, донор боло албайт экен. Өзүмдүн да өтүм жок. Эми дагы көрө жатарбыз. Баары жакшы болот деп тилеп отурабыз".

"Операцияга жетиштүү каражат чогулуп калды. Жардамга кол сунган бардык адамдарга терең ыраазымын", - деп кошумчалады Жумалиева.

Эсиңиздерге салсак, актёрго дарыгерлер 4-даражадагы боордун циррозу жана жугуштуу С гепатити менен ооруйт деген диагноз коюшкан.